Friday, December 27, 2013

اه يا جعانين

كنت في مناقشة مع مجموعة على اللي بيحصل في البلد
وناس كانت بتحكم وعك كتير
واتكلمنا في مبدأ "الشبع بعد جوع"
ولقينا الموضوع ده تقريباً موجود في كل حتة و تقريباً كمان جايز في كل بيت
ناس عندها نقص ومشاكل ومرة واحدة بقوا في مركز قيادي او إداري او حتى ديني
"بيتحولوا"

ايه ده؟!!!
استنوا كدة!!!
الناس دول مش جعانين و افتروا
الجوع ده طبيعي ومش عيب
والناس بتوع العلوم اللي مش عارف ايه بيصنفوها حاجة كدة اسمها "احتياج"
وده إحساس حلو اوي ان الواحد يحس بشبع بعد ما كان محتاج وجعان

المشكلة مش في الجوع
المشكلة في "النهم"
ان الواحد بيستعبد كل الموارد لاشباع ذاته
يعني الموضوع بيخرج برة دايرة الاحتياج الطبيعي للشعور بالرضا لدايرة قابلة للزيادة المستمرة، قادرة على انها تموت الانسان
هي دي المشكلة
"النهم"
"الذات"

القديس يوحنا ذهبي الفم اتكلم في موضوع خروج الانسان من جنة عدن وقال انها حاجة صحية جدا ليهم
ولولا انهم خرجوا وحسينا بالجوع والاحتياج، ماكناش هانحس بالنعمة المخلصة اللي اخدناها (محبة الله الآب، نعمة الابن الوحيد، شركة وموهبة وعطية الروح القدس ) اننا اصبحنا ابناء لله اﻵب بالتبني وورثة مع الابن، بل وشركاء الطبيعة الالهية
والمشكلة اللي كانت موجودة "الذات" كانت عند ابليس "النهم" ليصبح إله من ذاته، وبحسده دخل الموت الى العالم (القداس الباسيلي)، واحنا كمان حبينا الالوهة الذاتية وبقينا مفاجيع

مبروك علينا "شبعنا في المسيح" بعد ما كننا مفاجيع ذواتنا

Saturday, December 21, 2013

Μετάνοια

مروح من عند وسيم وقرفان ونعسان
بعد ما طلعت كوبري اكتوبر من غمرة عايز اروح المهندسين
قلت ادخل الوصلة اللي بتودي على كوبري 15 مايو
و"ماخدتش بالي" ونزلت النزلة اللي قبلها (نزلة شبرا والسبتية والذي منه)
طبعاً "اتغظت" وضربت كف على كف ومش عارف الطريق
قعدت الف الف، ومن شوارع لشوارع
بس اكتشفت أخيراً
عشان اوصل للمكان اللي عايزه كان لازم اعمل U-Turn، ومش مهم الطريق اللي اختارته و مشيته غلط.

Thursday, December 12, 2013

سما صافية

قاعد جنب ماري اختي واحنا راجعين على الصحراوي
الدنيا عمالة تمطر سألتها "اومال مفيش "قوس قزح" ليه؟!!!"
قالتلي "لسة السما مش صافية"

قوس قزح كانت علامة ميثاق الرب لنوح

اَلتَّكْوِينُ 9 :12-13 AVD

وَقَالَ ٱللهُ: «هَذِهِ عَلَامَةُ ٱلْمِيثَاقِ ٱلَّذِي أَنَا وَاضِعُهُ بَيْنِي وَبَيْنَكُمْ، وَبَيْنَ كُلِّ ذَوَاتِ ٱلْأَنْفُسِ ٱلْحَيَّةِ ٱلَّتِي مَعَكُمْ إِلَى أَجْيَالِ ٱلدَّهْرِ: وَضَعْتُ قَوْسِي فِي ٱلسَّحَابِ فَتَكُونُ عَلَامَةَ مِيثَاقٍ بَيْنِي وَبَيْنَ ٱلْأَرْضِ."

افتكرت وخصوصا في الفترة دي لوعود كتيرة، بس مابقتش واثق في كل حاجة واليأس متغلغل جوايا بعنف
بس فعلاً زي ما ماري قالت وحسيته مش هاشوف علامة الميثاق والوعد بتاع ربنا غير لما تصفى سمايا
محتاج بس "ثقة"
محتاج "ايمان"
السما هاتصفى ووعد ربنا اكيد وثابت

وَتَيَقَّنَ أَنَّ مَا وَعَدَ بِهِ هُوَ قَادِرٌ أَنْ يَفْعَلَهُ أَيْضًا. (رُومِيَةَ 4: 21)

لِنَتَمَسَّكْ بِإِقْرَارِ ٱلرَّجَاءِ رَاسِخًا، لِأَنَّ ٱلَّذِي وَعَدَ هُوَ أَمِينٌ.( ٱلْعِبْرَانِيِّينَ 10 :23)
آمين