Forever young

واحد من الافلام اللي خبطت جامد في طريقة التفكير عندي
الفيلم بتاع ميل جيبسون
هاحرق الفيلم لتالي مشافوش
بيتكلم على واحد وخطيبته، هي عملت حادثة، والدكاترة كانوا شبه فاقدين الامل
ومش متأكدين ان كانت هاتعيش ولا ﻷ، ومغيش حاجة في ايديهم.
والراجل يا عيني مش قادر يسيطر على نفسه ولا افكاره ولا مشاعره، ومش قادر يعمل حاجة
قرر انه يستخدم البحث بتاع انه ينام متجمد لحد مايبقى فيه علاج لخطيبته.
وبالفعل هرب من الواقع واخد العقار و نام عشان مش مستحمل فراق خطيبته و المجهول لامتى.
ويمر الوقت ويتنسي الراجل المتجمد ده لحد ما هايحصل موقف بعد سنين طوييييلة ويفوق ويشوفها بعد ما هي خفت وفاقت وعجزت وهو لسة شاب
ويكملوا بقى الفيلم.....

حرب الأفكار والمشاعر بتوصل لمرحلة الجنون او الهروب -لو ماتسيطرش عليها-

بس هل "الهروب" ممكن ييقى حل فعلاً وقدام يوصلوا للعلاقة دي وتبقى الدنيا زي الفل؟!!!

ويفضل القلب "Forever young" !!!!

لامؤاخذة "مرايته"

كنت سايق امبارح في الميرغني
والدنيا كانت زحمة جداً
وانا ماشي بين عربيتين
الراجل اللي على يميني قرر انه يكسر علي
ومالحقش اوي، فوانا مكمل، مرايتي خبطت و لامؤاخذة في مرايته.
اول ما عديته وقفت وباصيتله واعتذرت له جداً، لقيته مكشر وقاعد يشاور لي على مرايته اللي كانت مكسورة ولازقها ب"سيللوتيب"
لاقيته قاعد "يبرطم" ومش عاجبه اعتذاري، روحت جيبت "الاول" وقلت هاكمل ماليش دعوة بيه....

أولاً: الخبطة كانت لا تذكر،
ثانياً: ماجراش اي حاجة لمرايته.

الراجل بكل بساطة كان عايز يندب حظه ولامؤاخذة مرايته..
حاول انه يسقط علي انا مشكلته الممثلة في المراية

حبيبي، مرايتك مكسورة من الاول،
انا كنت ماشي في طريقي، وانت اللي كسرت علي وحاولت تتعدى على طريقي، واخرتها بتسقط علي عملتك...
بس أنا مكمل =)

بتمطر والدنيا مطينة 2

أخر مرة اتكلمت على موضوع المطرة والطينة والحوادث كام بسبب برابريز العربية
حصل معايا موقف تاني....
كنت ماشي بالعربية بليل وكنت في نفق الازهر
وفاتح النور وبالعافية شايف قدامي.
فتحت النور العالي جاب شوية بس برضه ضعيف
قلت يادي النيلة والقرف
لسة مشوار عند الكهربائي ويشوف "الكتاوت" وعطلة ومش عارف ايه! !! :@
وصلت مشوار صغير قبل ما كمل نزلت اشوف في ايه...
لقيت كمية طينة على الفوانيس رهيبة
جيبت ماية وفوطة وقعدت انضف
ومرة واحدة اكتشفت ان النور كويس وشغال زي الفل
اه اي نعم كان فيه شوية اثار للطين، بس النور ماكنش ليه علاقة ومالوش ذنب وظلمته معايا، وكان برضه لازم انضف الطين من على الفوانيس

بتمطر والدنيا مطينة 1

كنت لسة باتكلم على الفيس بوك على موضوع "المطرة" واد ايه الدنيا كانت تقرف....
نضفت العربية والبرابريز كويس اوي وطلعت عيني في التنضيف، وقلت أخيراً هامشي وهي نضيفة.
بس الدنيا على الارض كانت لسة "مطينة" من آثار المطرة -بطبيعة حال مصر-
واللي قدامي "شد" بالعربية و "طرطش" القرف على العربية تاني
قعدت اسب والعن....
ايه القرف ده لسة منضف العربية ومش هاشوف، والحوادث هاتزيد.
بس قررت اني اشغل "المساحات"
ولما نشوف اخرتها....

الجنوط سودة

كان في قصة زمان، في كتاب مصور
مش قادر انسى الكتاب ده.
كان مترجم وكان فيه قصص حلوة
زي
"ماري تبكي على اللبن المسكوب"
ديناصورات
ديوك
بس افتكرت من فترة كدة قصة بتاعة ولد من وسط افريقيا في قبيلة وكان بيلعب في "الطينة"
امه اول ما شافته بيلعب في الطينة "صرخت"
"انت ايه اللي عملته في نفسك ده؟!!!"
"ازاي توسخ نفسك كدة؟!!"
"شوفت وسخت نفسك ازاي؟!"
"كلك مطين، ولونك بقى "جربان" ورمادي كدة"
"فين لونك "الاسود" الجميل؟ !!"
وقعدت "تبستف" فيه شويتين

افتكرت القصة دي لما كنت لسة مودي العربية عشان تتنضف في المغسلة
عم احمد (ابو عبده) وقتها تعب جداً في العربية.
كان فيها حاجات غريبة، ﻷ و "كائنات" غريبة كمان
احمد وهو بينضف بمدفع المياه ان شفت طينة "مكعورة" وكسر حجر وزلط بيوقعوا وبيطلعوا من جوة "الجنوط"
وقتها افتكرت صوت "الرفة" اللي كنت باسمعه وانا سايق قبل ما"انضف" العربية.
كانت مذبحة
وبقيت من كتر النضافة اكتشفت ان الجنوط "سودة" وفعلاً شكلها جميل.

في مشكلتين بصراحة ماخبيش عليكم
من كتر "الوساخة" اللي كانت فيها العربية،
كان فيه حشرات غريبة وكائنات عجيبة.
كان فيه صوت مقرف ودوشة و"مقلق".
كان فيه طينة وقرف و"تقل" مقلل "الاتزان".
كان فيه جمال مستخبي (حتى لو كان اسود)، ، بس انا باحبها كدة، وعجباني وهي "سودة"
بعد ما نضفت الموضوع اختلف كلياً
العربية نفسها "فاقت" وبقيت احسن

مش المهم ان فيه رأي ان اﻹسود وحش، هو عاجبني انه الاصل.
حتى لو اتطين وبقى "جربان" اهو نضف ومبسوط بيه

المقطم
25 يناير 2014

عطشان تعالى اشرب

أخيراً العيد جيه :)
وامبارح بعد العيد دبتها جامد...
وكالعادة لازم قبل ما ادخل انام لازم اخد معايا ازازة مياه عشان باموت من العطش بعد كل الاكل بتاع العيد....
على اخر الفجر كدة قمت وعطشاااااااان
لقيت نفسي كسلان اقوم اشرب، قلت مانا لو شربت هاتزنق وهاحتاج ادخل حمام.
بس لاقيت انني بكسلي ده هاتحرم من تمتعي بالارتواء

إِشَعْيَاءَ 55 :1-6 AVD

«أَيُّهَا ٱلْعِطَاشُ جَمِيعًا هَلُمُّوا إِلَى ٱلْمِيَاهِ، وَٱلَّذِي لَيْسَ لَهُ فِضَّةٌ تَعَالَوْا ٱشْتَرُوا وَكُلُوا. هَلُمُّوا ٱشْتَرُوا بِلَا فِضَّةٍ وَبِلَا ثَمَنٍ خَمْرًا وَلَبَنًا. لِمَاذَا تَزِنُونَ فِضَّةً لِغَيْرِ خُبْزٍ، وَتَعَبَكُمْ لِغَيْرِ شَبَعٍ؟ ٱسْتَمِعُوا لِي ٱسْتِمَاعًا وَكُلُوا ٱلطَّيِّبَ، وَلْتَتَلَذَّذْ بِٱلدَّسَمِ أَنْفُسُكُمْ. أَمِيلُوا آذَانَكُمْ وَهَلُمُّوا إِلَيَّ. ٱسْمَعُوا فَتَحْيَا أَنْفُسُكُمْ. وَأَقْطَعَ لَكُمْ عَهْدًا أَبَدِيًّا، مَرَاحِمَ دَاوُدَ ٱلصَّادِقَةَ. هُوَذَا قَدْ جَعَلْتُهُ شَارِعًا لِلشُّعُوبِ، رَئِيسًا وَمُوصِيًا لِلشُّعُوبِ. هَا أُمَّةٌ لَا تَعْرِفُهَا تَدْعُوهَا، وَأُمَّةٌ لَمْ تَعْرِفْكَ تَرْكُضُ إِلَيْكَ، مِنْ أَجْلِ ٱلرَّبِّ إِلَهِكَ وَقُدُّوسِ إِسْرَائِيلَ لِأَنَّهُ قَدْ مَجَّدَكَ».  اُطْلُبُوا ٱلرَّبَّ مَا دَامَ يُوجَدُ. ٱدْعُوهُ وَهُوَ قَرِيبٌ.

تعلقنا بكسل او شهوة او حتى بممارسات طقسية من غير حياة وعلاقة حقيقية، عمره ماهيجيب ارتواء.

المسيح اعطانا ارتواء وشبع واحنا غلابة ماعندناش فضة

كل سنة وانتم طيبين عيد التجسد الإلهي
المقطم 7 يناير 2014
عيد التجسد الإلهي بالتقويم القبطي

Composer

أخيراً روحت حفلة عمر خيرت في الأوبرا، كانت اخر مرة لخيرت في الأوبرا من 7 سنين
بصراحة على ما كنت مبسوط انني رايح تاني اسمع حاجة نضيفة، على اد ماكانت تجربة عنيفة وموجعة.
بس المختصر اللذيذ كنت مبسوط
شوفت فيها خيرت (كمؤلف موسيقي ومايسترو) عامل شغل عالي
كان عارف يقسم في كل مقطوعة ان في آلة او اتنين تبقى واضحة ومسيطرة عن باقي الآلات.
وبعد ماتخلص المقطوعة يقدمه للجمهور بكل احترام وتواضع ويشيد بيه وتعبه ومهارته.
عجبني انه كان بيظهر كل واحد في كل مقطوعة وبيشجعه، مع انه في الاخر هما مجرد عازفين، وخيرت اللي ليه كل الفضل هو المؤلف وهو المايسترو وهو اللي اداهم كلهم فرصة يظهروا
كل واحد ليه دور...
كل واحد مع انه مجرد عازف بس هايبان، وهاتجيله فرصته، ومالوش فضل...
المايسترو فاهم شغله كويس وعارف توقيت كل واحد وانهي مقطةعة اللي هايبان فيها العازف ده بمهارة.
ما هو المؤلف وفاهم كل الآلات وهو اللي وزع.
المؤلف والمايسترو ده فعلاً فاهم بيعمل ايه، فاهم ومقسم دور كل واحد، عارف يظهر كل واحد ويديله فرصته وبرضه من غير نفخة كدابة والكل كان مبسوط.

بميلاده اخدنا التبني مش شوية ظهور وتنطيت وبس

وَلَكِنْ لَمَّا جَاءَ مِلْءُ ٱلزَّمَانِ، أَرْسَلَ ٱللهُ ٱبْنَهُ مَوْلُودًا مِنِ ٱمْرَأَةٍ، مَوْلُودًا تَحْتَ ٱلنَّامُوسِ، لِيَفْتَدِيَ ٱلَّذِينَ تَحْتَ ٱلنَّامُوسِ، لِنَنَالَ ٱلتَّبَنِّيَ.
غَلَاطِيَّةَ 4:4-5 AVD

القاهرة 6 يناير 2014
برامون التجسد الإلهي بتقويم الأقباط
عيد الظهور الإلهي بالتقويم الغريغوري